|
|
来了杨村必看景点
▲蔡屋古榕
▲燕翼围
▲太平桥
▲乌石围
|
|
|
|
·当前位置:首页 > 杨村文化 > 杨村山歌 > 内容 |
|
你又苦来涯又燥 |
|
作者:蔡海峰整理 发布时间:2020/2/12 22:17:24 |
|
你又苦来涯又燥,烂衫穿中烂竹篙。
你来涯边借筒米,涯去你边食餐朝。
食得饱饭唔得消,出去门背跳几跳。
人家问涯做什么?两个狗虱咬紧腰。
上条埂来过横排,寄信老妹做双鞋。
话你做长你做短,有心没意做给涯。
你话没心涯有心,鞋头鞋尾打勾针。
做了几多穿心夜,断了几多绣花针。
哪人跌苦唔像涯,洗净身脚又没鞋。
隔壁大嫂做鞋卖,有没烂鞋拿双涯。
涯唔话来你唔知,三岁没娘跟阿咪。
食饭唔敢乱钳菜,睡觉唔敢乱牵被。
涯唔讲来你唔知,讲起米筛成簸箕。
食了几多洗碗水,盖了几多烂蓑衣。
新作田垄种韭菜,讲起老家太厉害。
行路唔敢乱踏脚,食饭唔敢乱钳菜。
韭菜打花一根心,讲起老家涯伤心。
食了几多洗碗水,着了几多烂衫巾。
雕子没叫顺坑飞,童养媳妇好吃亏。
天晴落雨都爱去,肚饥口渴唔敢归。
运气甘假唔奈何,捞蚌捡到死田螺。
进庙烧香遇到鬼,烧碗开水粘了锅。
山歌好唱难开头,木匠难做走马楼。
石匠难打石狮子,铁匠难打钓鱼钩。
讲起山歌唔晓唱,勺麻倒米唔晓量。
一百铜钱数唔出,连起妹来唔内行。
天上落雨地下装,哪有地下落当上。
世间只有哥问妹,哪有细妹先问郎。
天上落雨大唔该,唔该落雨淋涯妹。
等涯细妹归到屋,由你整天塌下来。
天上落雨太唔住,唔该落雨淋亲哥。
等涯亲哥归到屋,由你落满这条河。
天上有雨尽管落,唔要满天暗摸摸。
老妹有事当面讲,唔要背后讲阿哥。
你有山歌尽管唱,唔要装做老实样。
阿哥好比山坑水,唔敢出来夹大江。
|
|
|
|
【关闭本页】【返回页顶】 |
|
|
|
|