正月恋哥系新年，妹在家中等哥连；

想哥唔见哥的面，走进闺房泪涟涟。

二月恋哥系春天，哥忙农活去耕田；

妹捡猪菜路边过，问哥想恋唔想恋？

三月恋哥系清明，春雨到来百花生；

万里江山在似锦，问哥约人唔约人？

四月恋哥四月八，谷种下田发嫩芽；

燕子双双说细话，哥唔恋妹冇办法。

五月恋哥五月五，房门艾叶伴菖蒲；

好个端阳独自过，唔得恋哥背地哭。

六月恋哥六月六，青天渺渺妹心愁；

一世人生得半世，再唔恋哥冇日头。

七月恋哥七月七，讲到攀花妹着力；

搭赖涯妹命唔好，哥唔恋妹也有益。

八月恋哥中秋天，想哥唔得哥来恋；

人家恋哥结个伴，老妹恋哥两冇缘。

九月恋哥九月九，秋风秋雨妹心愁；

好花又冇蜂蝶恋，可惜妹栽花一蔸。

十月恋哥小阳春，恋哥唔得伤妹心；

这世人生唔连伴，来到世间枉为人。

十一恋哥降雪霜，花木落叶遍地黄；

恋哥唔得哥结伴，丢下老妹好凄凉。

十二恋哥雪花飘，梅花欢笑妹心焦；

再好年华虚度过，唔得连哥枉自劳。